Luftë elektronike arabo-izraelite

Një hacker nga Arabia Saudite, ka shkaktuar jo pak kokëçarje ditët e fundit në Izrael. Fillimisht, ai publikoi të dhënat sekrete dhe kartave të kreditit të shumë izraelitëve në tre banka, gjë e cila shkaktoi panik dhe frikë tek depozituesit. Sakaq, dy ditë më parë, hackeri në fjalë arriti të bllokojë bursën e Izraelit dhe fluturimet e një kompanie ajrore në vend për disa orë.

Sipas gazetave izraelite, hackeri saudit arriti të depërtojë dhe në faqet e disa ministrive kryesore të Izraelit. Ai ka shkruar në faqen e zv.ministrit të jashtëm Dani Ijalon:”Kërkon falje Dani. Ti nuk je burrë dhe nuk më ndalon dot.”

Nga ana tjetër, një grup hackerësh izraelitë, janë hakmarrë duke bllokuar bursën e Arabisë Saudite dhe atë të Abu Dabit. Në faqet e tyre, ata kanë shkruar se nëse hackerat mbështetës të çështjes palestineze do të vazhdojnë të sulmojnë faqet izraelite, ata do të ndërmarrin sulme më të rënda, duke bllokuar hapjen e faqeve arabe në internet për periudha të gjata kohore.

Hackeri saudian, i cili njihet me nofkën “xOmar” u ka bërë thirrje të gjithë aktivistëve mbështetës të çështjes palestineze dhe lëvizjes Hamas, që ta forcojnë frontin e luftës elektronike kundër Izraelit pushtues.

Nëse këto tentativa dhe sulme do të vazhdojmë, do të kemi një luftë elektronike të hapur mes hackerave arabë dhe atyre izraelitë.

(AO)