Siri, tanke për të shtypur protestat

Tanke dhe trupa ushtarake kanë hyrë në Zabadan të Sirisë pas protestave masive të mbajtur në qytetin kufitar kundër presidentit, Bashar al Asad.

Ushtria ka bombarduar qytetin por sipas raporteve të aktivistëve, ka hasur në rezistencën e pjesëtarëve të ushtrisë për lirinë siriane, që ka mjaft influencë në këtë zonë.

Dhjetëra mijëra vetë morën pjesë në tubime mbështetëse për grupin e dezertorëve që kërkon të rrëzoje Asadin nga pushteti.

Figura të rëndësishme opozitare tregojnë se Zabadani është izoluar dhe komunikimet janë ndërprerë. Sipas të njëjtave raporte, nga bombardimet e ushtrisë kanë mbetur të vrarë 12 civilë, tre prej tyre fëmijë.

(TCH)

Liga Arabe paralajmëron luftë civile në Siri

Liga Arabe ka tërhequr sërish vërejtjen se Siria mund të rrëshqasë drejt luftës civile. Paralajmërimi i saj vjen pas protestave të sotme, në të cilat raportohet të jenë vrarë të paktën 10 protestues.

Në të tjera zhvillime, Shtetet e Bashkuara kanë shprehur shqetësimin ndaj raporteve që kumtojnë për arritjen e një anije ruse në Siri, të ngarkuar me municion, pavarësisht sanksioneve të Bashkimit Evropian, SHBA-së dhe të Ligës Arabe që ndalojnë dërgesat e tilla.

Rusia prej kohësh ka qenë furnizuese e madhe armësh për Sirinë.

Kjo e fundit, që nga marsi i vitit të kaluar, është përfshirë nga protestat që bëjnë thirrje për largimin e presidentit Bashar al-Asad.

Mbi 5,000 persona besohet të kenë humbur jetën në trazira.

(REL)