Të martuarit e vajzës e cila nuk bart shami

Pyetja:

Esselamu alejkum!

Profesor i nderuar, a më lejohet ta kërkojë fejesën e një vajze e cila, ndonëse falë namaz, tregohet e devotshme, por nuk është e mbuluar?

Përgjigjja:

Bismil-lahir-rahmanir-rahim

I nderuar, lidhur me fejesën, Pejgamberi a.s. në hadithin e transmetuar nga Ebu Hurejra r.a., ka thënë: “Femra martohet për katër cilësitë: Për shkak të pasurisë, për shkak të prejardhjes familjare, për shkak të bukurisë, dhe për shkak të fesë së saj. (E ti) jepi përparësi fesë, qetësoje vetveten”.[1]

Mendoj se nëse vajza, për të cilën flisni ju dhe siç e cilësoni ju se është fetare, falë pesë kohët e namazeve, është e ndershme dhe i frikohet Allahut xh.sh.,  por ja që ajo akoma nuk ka zgjidhur problemin e mbulesës, nuk do të bënit asnjë gabim nëse ju kërkoni dorën e saj për martesë. Mendoj kështu për arsye se nëse ajo ka frikën e Allahut xh.sh. dhe falë namazin, jam shumë i bindur se një ditë, herët apo vonë, bindja e saj në Allahun xh.sh. dhe namazi i saj do të ndikojnë pozitivisht që të zgjidhë edhe dilemën e mbulesës. Ajo sigurisht se nuk asgjëson mbulesën, por ja që nuk mund të sjellë vendim të prerë për t’u mbuluar, e për këtë ka nevojë për përkrahje nga dikush, dhe sigurisht se ju do të jeni përkrahës në këtë rast që ajo, inshallah, një ditë, e ndikuar nga namazi i saj dhe ndihma e juaj, do të mbulohet.

Pra, ju nuk do të bënit gabim, por përkundrazi me veprimet tua të sinqerta dhe me nijetin tënd të mirë, do të keni sukses t’ia arrini qëllimit të mbulesës dhe kështu do të jeni të shpërblyer te Allahu xh.sh. dhe të keni jetë të lumtur.

Allahu e di më së miri!

[1]  Ebu Davudi 2/219, Ibni Maxhe 1/597.

_____________
Jusuf Zimeri
Prill, 2011
www.breziiri.com